Azərbaycan xalqının tarixində elə günlər var ki, həmin günlər təkcə təqvim hadisəsi deyil, həm də milli qürur, qəhrəmanlıq və vətənpərvərlik nümunəsi kimi yaddaşlarda yaşayır. Bu günlərdən biri də Azərbaycan Silahlı Qüvvələrinin yaranmasının ildönümüdür. Bu əlamətdar tarix xalqımızın gücünü, dövlətimizin qüdrətini və ordumuzun sarsılmaz iradəsini özündə əks etdirən mühüm bayramdır. Məhz bu münasibətlə “Shirvan Operating Company Ltd” Şirkətinin Azərbaycan Respublikasındakı Filialı Həmkarlar İttifaqı Komitəsinin sədri Məmmədov Taleh qeyd edir ki, “26 iyun-hərbi rəşadət, şərəf və igidlik bayramıdır”.

Azərbaycan Ordusu bu gün regionun ən güclü silahlı qüvvələrindən biri hesab olunur. Bu gücün formalaşması təsadüfi deyil. Müstəqilliyimizin ilk illərində ölkəmizin üzləşdiyi çətinliklər, hərbi və siyasi problemlər fonunda dövlətçiliyimizin qorunması üçün güclü ordunun yaradılması həyati əhəmiyyət daşıyırdı. Məhz belə bir dövrdə xalqın təkidli tələbi ilə hakimiyyətə qayıdan Ümummilli Lider Heydər Əliyev Azərbaycan dövlətinin xilaskarı olmaqla yanaşı, müasir Azərbaycan Ordusunun da memarı oldu.

Ulu Öndər Heydər Əliyevin uzaqgörən siyasəti nəticəsində ölkəmizdə nizami ordu quruculuğu istiqamətində mühüm addımlar atıldı. Orduda vahid komandanlıq sistemi yaradıldı, peşəkar kadr hazırlığı gücləndirildi, hərbi hissələrin maddi-texniki bazası möhkəmləndirildi və Silahlı Qüvvələrin inkişafı dövlət siyasətinin prioritet istiqamətlərindən birinə çevrildi. Bu gün Azərbaycanın qazandığı hərbi uğurların təməlində məhz Heydər Əliyevin müəyyən etdiyi strateji kurs dayanır.

Ulu Öndərin əsasını qoyduğu ordu quruculuğu siyasəti bu gün onun siyasi kursunun layiqli davamçısı, Azərbaycan Respublikasının Prezidenti, Müzəffər Ali Baş Komandan cənab İlham Əliyev tərəfindən uğurla davam etdirilir. Son illərdə Azərbaycan Ordusunun maddi-texniki təminatı daha da gücləndirilmiş, müasir silah və texnikalar alınmış, şəxsi heyətin döyüş hazırlığı yüksək səviyyəyə çatdırılmışdır.

Bu siyasətin ən böyük nəticəsi isə 2020-ci ildə baş vermiş 44 günlük Vətən müharibəsində əldə edilən möhtəşəm Zəfər oldu. Müzəffər Ali Baş Komandan İlham Əliyevin qətiyyətli rəhbərliyi altında Azərbaycan Ordusu işğal altında olan torpaqlarımızı azad etdi və ölkəmizin ərazi bütövlüyünü bərpa etdi. Bu tarixi Qələbə Azərbaycan xalqının gücünü, birliyini və dövlətimizin qüdrətini bütün dünyaya nümayiş etdirdi.

Azərbaycan əsgəri döyüş meydanında misilsiz qəhrəmanlıq göstərərək tarix yazdı. Şəhidlərimizin qanı, qazilərimizin şücaəti və hərbçilərimizin fədakarlığı nəticəsində xalqımız uzun illər gözlədiyi Böyük Qələbəyə qovuşdu. Bu gün hər bir azərbaycanlı həmin qəhrəmanlıq salnaməsi ilə fəxr edir.

Ordumuzun qazandığı uğurlar təkcə hərbi sahədə deyil, həm də milli ruhun yüksəlməsində mühüm rol oynadı. Azərbaycan gəncləri üçün vətənpərvərlik nümunəsinə çevrilən bu Zəfər xalqımızın milli birliyini daha da möhkəmləndirdi. Bu gün Azərbaycanın hər bir vətəndaşı Ordumuzun yanında olduğunu qürurla bəyan edir.

Silahlı Qüvvələr Günü hər bir azərbaycanlının bayramıdır. Çünki bu gün dövlətimizin müstəqilliyinin, suverenliyinin və təhlükəsizliyinin təminatçısı olan Azərbaycan Ordusunun bayramıdır. Ordumuzun hər bir əsgəri, zabiti və giziri xalqımızın etimadını doğruldaraq Vətənin keşiyində ayıq-sayıq dayanır.

Bu gün Azərbaycan Ordusunun sıralarında xidmət edən hər bir hərbçi Ulu Öndər Heydər Əliyevin ideyalarına, dövlətçilik prinsiplərinə və Ali Baş Komandan İlham Əliyevin müəyyən etdiyi strateji hədəflərə sadiq qalaraq fəaliyyət göstərir. Məhz buna görə də Azərbaycan Ordusu gündən-günə daha da güclənir və yeni uğurlara imza atır.

Şəhidlərimizin əziz xatirəsi hər zaman qəlbimizdə yaşayır. Onların göstərdiyi qəhrəmanlıq gələcək nəsillər üçün örnəkdir. Eyni zamanda qazilərimiz də xalqımızın qürur mənbəyidir. Dövlətimiz tərəfindən şəhid ailələrinə və qazilərə göstərilən diqqət və qayğı sosial siyasətin mühüm istiqamətlərindən biridir.

Məmmədov Taleh bildirir ki, Azərbaycan xalqı öz Ordusuna inanır və güvənir. Çünki bu Ordu xalqın Ordusudur. Dövlətimizin təhlükəsizliyi və ərazi bütövlüyünün qorunması istiqamətində əldə olunan bütün nailiyyətlər Azərbaycan Ordusunun peşəkarlığının və gücünün göstəricisidir.

Bu gün Qarabağda və Şərqi Zəngəzurda aparılan genişmiqyaslı quruculuq işləri də əldə edilmiş Zəfərin nəticəsidir. Azad edilmiş torpaqlarımızda yeni şəhərlər, kəndlər, yollar, məktəblər və sosial obyektlər tikilir. Bütün bunlar şəhidlərimizin qanı, qazilərimizin fədakarlığı və Ordumuzun qəhrəmanlığı sayəsində mümkün olmuşdur.

Azərbaycan Silahlı Qüvvələrinin yaranmasının ildönümü münasibətilə Məmmədov Taleh bütün hərbi qulluqçuları, veteranları, qaziləri və şəhid ailələrini ürəkdən təbrik edir. O qeyd edir ki, bu bayram yalnız hərbçilərin deyil, bütün Azərbaycan xalqının bayramıdır. Çünki bu gün qəhrəmanlıq, rəşadət, şərəf və vətən sevgisinin təntənəsidir.

Sonda “Shirvan Operating Company Ltd” Şirkətinin Azərbaycan Respublikasındakı Filialı Həmkarlar İttifaqı Komitəsinin sədri Məmmədov Taleh Azərbaycan Silahlı Qüvvələrinin bütün şəxsi heyətini, ehtiyatda olan hərbçiləri, qaziləri, veteranları və şəhid ailələrini səmimi qəlbdən təbrik edir, onlara möhkəm cansağlığı, ailə səadəti, uğurlar və yeni nailiyyətlər arzulayır. Qəhrəman Ordumuz daim qüdrətli olsun, üçrəngli Bayrağımız hər zaman zirvələrdə dalğalansın!

Bayramınız mübarək!

Fərid Faiqoğlu Səfərov

Azərbaycan Jurnalistlər Birliyinin üzvü