Bu gün bunlar hər bir azərbaycanlının qürur  hissi ilə, sevinc göz  yaşları ilə  bütün dünyaya dediyi ifadələrdir. Əminliklə deyə bilərik ki, bunları deməyə hər bir azərbaycanlının haqqı çatır. Çünki bizim Ordumuz, xalqımız və sərkərdəmiz hər hansı bir ölkənin, xalqın torpağını işğal etmək uğrunda döyüşlərdə deyil, vətənpərvərliyin, igidliyin, cəsurluğun və sevginin ən uca zirvəsi olan doğma yurd, torpaq uğrunda, ədalətin bərpa olunması uğrunda aparılan mübarizədə qalib gəlmişdir. Biz düz 30 il həsrətlə bunu gözlədik. Atəşkəs əldə olunduğu 27 il müddətində səbir, dözümlülük nümayiş etdirdik. Dünyanın ən ali beynəlxalq təşkilatlarının, orqanlarının çıxardıqları Qətnamələrin, qəbul etdikləri Qərarların icrasında, haqq-ədalətin bərpa olunmasında qanunların aliliyinə hörmətin olduğuna inandıq. Sözün qüdrətinin silahın gücündən üstün olmasına inandıq. Lakin bir şeyi unutmuşduq-qarşımızdakı düşmənin  insan övladına  xas olmayan vəhşiliyini. Qarşındakı düşmən mərd olanda ölmək və öldürmək eyni hisslər yaşadır insanda. Amma bu gün şanlı Azərbaycan əsgəri cəbhə xəttində düşməni Ali Baş Komandan İlham Əliyevin dediyi kimi "iti qovan kimi qovur".  Bu gün Azərbaycan əsgəri düşmənlə onun "dilində danışmaq"la  kim deyil,  nə olduğunu ona sübut edir.
Hər bir xalqın tarixində qürurverici, yadda qalan günlər olur. Son günlər cəbhə boyu əks hücuma keçən Azərbaycan əsgəri Azərbaycanın şanlı tarixini yazmaqdadır. Bu gün Azərbaycan əsgəri 30 il həsrətlə gözləyən Cəbrayıllıların, onlarla kənd və yaşayış məskənimizin sakinlərinin qəlbindəki ümidi gözlərindəki sevinc yaşları ilə əvəz etdi. Bununla yanaşı, əsgərimiz, təkbaşına bütöv bir orduya qarşı hücuma  atılaraq  düşməni darmadağın edib qanına qəltan edən Mübarizin şəhid olduğu məkanda bir daha ermənini qanına boyayaraq  qəhrəmanımızın valideynlərinə təskinlik  verdi.  
Əslində əsrlər boyu düşmən təcavüzünə məruz qalan  xalqımız  tarixin bütün sınaqlarından üzüağ çıxmışdır. "Qəhrəmanları tarix yetişdirər" - deyiblər.  Bu gün qəhrəmanlıq salnaməsi yazan Azərbaycan əsgəri ata və babalarımızn tarix boyu dastanlara çevrilən igidlik kitablarına yeni səhifələr artırırlar.  Dünyanın ən güclü orduları sırasında yer alan  Azərbaycan Silahlı Qüvvələri  dəfələrlə  NATO sülhməramlıları ilə birgə dünyanın ən qaynar nöqtələrində sülhün, ədalətin bərpa edilməsində, atəşkəs rejiminə əməl olunmasında, günahsız insanların həlak olmasının qarşısının alınmasında iştirak edib. Bu gün bu missiyanı öz torpağında yerinə yetirən Azərbaycan əsgərinin heç bir hərbi dəstəyə ehtiyacı yoxdur.  Daim regionda sülhün təminatçısı qismində çıxış edən qardaş Türkiyədən yalnız mənəvi dəstək alan xalqımız və igid oğullarımız düşmənə ağır zərbələr vurmaqla güc üstünlüyünün Azərbaycan tərəfində olduğunu nümayiş etdirdilər. 
Son günlər cəbhə boyu yaşanan hadisələr, 30 il müddətində beynəlxalq ictimaiyyətin Ermənistanın işğalçılıq siyasətinə göz yumması nəticəsində düşmənin bundan istifadə edərək  hərbi qulluqçularla yanaşı mülki  vətəndaşlarımızın ölümü ilə nəticələnən çoxsaylı təxribat xarakterli hücumlarına verilən adekvat cavabdır. Oktyabr ayının 4-də xalqa müraciəti zamanı Azərbaycan Prezidenti, Ali Baş Komandan İlham Əliyevin söylədiyi kimi - "Azərbaycan işğalçı ölkə deyil. Başqasının torpağında Azərbaycanın gözü heç vaxt olmayıb. Azərbaycan yalnız tarixən ona məxsus olan torpaqların geri qaytarılmasını istəyir".
Bu gün təlaş  içərisində qalan düşmən dünya  ictimaiyyətindən yalvarışlarla kömək istəyir.  30 il haqq-ədalətin tapdanmasına, erməni təcavüzünə, beynəlxalq hüquq normalarının ermənilər tərəfindən pozulmasına, beynəlxalq təşkilatların qətnamə, qərar və çağırışlarına düşmən tərəfindən əməl olunmamasına  göz yuman dünya birliyi Azərbaycanın haqq sözü qarşısında əlacsız vəziyyətdə qalıb. 30 il sülhsevər Azərbaycan xalqı danışıqlara inanıb. Diplomatik üsullara sadiq olub. Beynəlxalq birliyə etibar edib. Xalqımızın etibarından istifadə olunub, onun səbri ilə oynayıblar. Öz doğma Vətənində qaçqın və məcburi köçkün həyatı yaşayan 1 milyon soydaşımız yurd həsrəti ilə yaşayıb.
Vətən müharibəsi Azərbaycanın Ermənistana qarşı hərbi əks hücum əməliyyatları Xeyrin Şərə qarşı mübarizəsi kimi dəyərləndirilə bilər. Azərbaycan öz torpaqlarının işğaldan azad olunması uğrunda haqq savaşına qalxdı. Dünyaya multikulturalizmin və tolerantlığın, mədəniyyətlərarası dialoqun mərkəzi sayılan Azərbaycanın tarixi yurd yeri olan Şuşada, Xankəndidə, digər işğal altında olanda ərazilərimizdə tarixi abidələrimiz dağıdılırdı, məscidlərimiz sökülürdü. Bütün bunlar xalqımıza qarşı təhqir idi. Xalq öz dövlətinin yeni tarixini yazdı. Bu gün tarixi ədalət bərpa olundu. Çünki Qarabağ torpağı Azərbaycan xalqının əzəli tarixi torpağıdır. Azərbaycan xalqı əsrlər boyu bu torpaqlarda yaşayıb, yaradıb, qurub, tikib. Azərbaycan Prezidenti İlham Əliyevin qətiyyətlə bildirdiyi kimi - "Qarabağa həyat qayıdacaqdır. Azərbaycan dövləti bütün şəhərləri bərpa edəcək. Ermənilər tərəfindən dağıdılmış bütün məscidlər bərpa olunacaq və oradan azan səsi yenə də eşidiləcəkdir. Azərbaycan xalqının tarixi-mədəni irsini silmək üzrə Erməni cəhdlərinə son qoyulacaqdır".
"Rossiya - 1", " Əl-Cəzirə", "TRT -1", "BBC" kanallarına verdiyi son müsahibələrində Azərbaycan Respublikasının Prezidenti, Ali Baş Komandan İlham Əliyevin xalqımızın, əsgərimizin zəfər yürüşünün sonadək davam edəcəyini vurğulaması, danışıqların isə yalnız bizim şərtlərimiz əsasında torpaqlarımızdan düşmən silahlı qüvvələrinin çıxarılmasından sonra bərpa edilə biləcəyini qeyd etməsi xalqın öz lideri ətrafında birləşərək daim ordumuz yanında oldu və Qələbə gününü xalq böyük sevinclə qeyd etdi. Vətən müharibəsində vuruşan ordumuzun qələbəsi təkcə Azərbaycanın Ermənistan üzərində deyil, həm də onun havadarları üzərində qələbəsi oldu. Bu, haqqın, ədalətin zəfər çalacağı qələbə oldu. Bu son 27 ildə apardığımız uğurlu daxili və xarici siyasətimizin qələbəsi oldu. Sərin payız günlərində xalqımızın üzünə günəş tək doğaraq qəlblərə istilik gətirdi bu qələbə.
Bu günlərdə xalqımızın öz əsgərinə, öz liderinə inamı, dəstəyi, ruh yüksəkliyi və ordumuzun döyüş qabiliyyəti, qüdrəti çox yüksəkdir. Bu gün xalq-ordu-dövlət birliyi Azərbaycanı daha da güclü edib. Allah sizi qorusun Azərbaycan əsgəri! Ali Baş Komandanın rəhbərliyi altında daim irəli!!!
Silahlı Qüvvələrin Ali Baş Komandanı İlham Əliyevin və Şanlı Azərbaycan Ordusunun səyləri ilə tariximizə növbəti şanlı səhifəsini yazdı. Belə ki, müqəddəs Vətən torpaqlarımız az qala 30 illik həsrətdən sonra Ermənistan ordusunun işğalından azad edildi. Azərbaycan Ordusunun zəfər yürüşləri hər bir azərbaycanlının qəlbini dağa döndərir. Qürur, fəxr, fərəh hissləri yaşayan xalqımız nəhayət ki, qələbə zəfərini qeyd etdi. 
Bugün bütün Azərbaycan xalqı tək yumruq kimi birləşərək Ordumuzun və Ali Baş Komandanın ətrafında sıx birləşib. Ümumiyyətlə bu günlərdə hər birimizi qürurlandıran, ümidləndirən məqamlar kifayət qədər çoxdur. Bunlardan ən əsası ölkəmizdə möhkəm birliyin və bərabərliyin olmasıdır. Hər bir Azərbaycan vətəndaşı dövlət başçısı, Silahlı Qüvvələrin Ali Baş Komandanı İlham Əliyevin əmrinə müntəzirdir. 
Artıq 28 il idi ki, əzəli torpaqlarımız olan Qarabağ eli başda Ali Baş Komandan olmaqla müzəffər ordumuz sayəsində qələbə çalaraq işğaldan azad etdik. Gözün aydın AZƏRBAYCAN!
Azərbaycan xalqı qələbə zəfərini bəxş edən Ali Baş Komandan İlham Əliyev cənablarına minnətdarlığını təcəssüm etdirir.
Qarabağ-Azərbaycandır!

Mübariz Əhmədzadə
Zaqatala Rayon İcra Hakimiyyətinin başçısı