Dəyərli ziyalı, fədakar müəllim və el ağsaqqalı Akif Ağalıyevin insanlıq portreti...
İnsan ömrü bəzən uzun yolların, ağır sınaqların, zamanın sərt küləklərinin içindən keçərək formalaşır. Elə insanlar var ki, onların həyat yolu yalnız öz taleyi ilə məhdudlaşmır; yaşadığı kəndin, elin-obanın, bir xalqın mənəvi yaddaşına çevrilir. Belə insanlar dəyişən zamanların içində dəyişməyən mənəviyyat nümunəsi olur. Onlar həyatın sınaqlarından alnıaçıq çıxaraq insanlıq adını ucaldır, ömürlərini sədaqətə, xeyirxahlığa və halallığa həsr edirlər. Azərbaycanın cənub bölgəsində — Astaranın gözəl guşəsində yaşayan dəyərli ziyalı, fədakar müəllim və el ağsaqqalı Akif Ağalıyev də məhz belə insanlardandır.
Bu ağsaqqalın ömrü torpağa, yurda, insanlara və mənəviyyata bağlılıq nümunəsidir. Onun baxışlarında sadəlik, danışığında hikmət, davranışında isə böyük insanlıq dayanır. İllərin sınağından çıxmış, ağrıları da, sevincləri də görmüş bu insanın ən böyük sərvəti vicdanı və insan sevgisidir. Çünki Akif müəllim həyat boyu insan olmağın ən ali məqamını qorumağı bacarıb.
Bu gün cəmiyyətin ən böyük ehtiyaclarından biri insanlıqdır. Maddiyyatın mənəviyyatı üstələdiyi, süni münasibətlərin səmimiyyəti kölgədə qoyduğu bir dövrdə saf ürəkli, mərhəmətli, xeyirxah insanlar az tapılır. Akif Ağalıyev isə bu mənada bütöv bir məktəbdir. O, insanlara yalnız müəllim kimi deyil, həm də mənəvi dayağı olan bir ağsaqqal kimi yol göstərib. Çünki müəllimlik onun üçün sadəcə peşə olmayıb; müəllimlik onun həyat fəlsəfəsi, insan yetişdirmək missiyası olub (Akif müəllimin yetirmələri bu gün Azərbaycanın müstəvisində sağlam əqidəli vətəndaş kimi tanınırlar. Onlardan biri Azərbaycanın qəhrəman oğlu, Xüsusi Təyinatlı Qüvvələrin şücaətli giziri Şərafəddin Sərdar oğlu Xankişiyevdir. Şərafəddinin əqidə yolunun bələdçisi məhz Akif Ağalıyevdir...red.).
1954-cü ildə Astara rayonunun Hamoşam kəndində ziyalı və çoxuşaqlı ailədə dünyaya göz açan Akif Ağalıyev hələ uşaqlıq illərindən zəhmətin, dürüstlüyün və böyüyə hörmətin nə olduğunu görərək böyüyüb. Ailəsində aldığı mənəvi tərbiyə onun gələcək həyat yolunun əsasını təşkil edib. Şıxəli Qurbanov adına Hamoşam kənd orta məktəbində təhsil aldığı illərdə həm çalışqanlığı, həm də tərbiyəsi ilə seçilib. Təhsilini davam etdirmək üçün Azərbaycan Dövlət Bədən Tərbiyəsi İnstitutuna daxil olması onun həyatında yeni bir mərhələnin başlanğıcı olub.
1976-cı ildə ali təhsilini başa vurduqdan sonra doğma məktəbinə müəllim kimi qayıtması isə vətənə və yurda bağlılığının ən gözəl nümunəsi idi. Çünki bəzi insanlar böyüdükcə doğulduqları yeri unudurlar, amma Akif müəllim üçün doğma kənd hər zaman müqəddəs ünvan olub. O, öz biliyini, enerjisini və həyatını doğulduğu torpağın övladlarına həsr etdi.
Akif müəllimin müəllimlik fəaliyyəti yalnız dərs keçməklə yekunlaşmırdı. O, şagirdlərinin qəlbinə yol tapmağı bacaran nadir müəllimlərdən idi. Hər bir uşağa fərdi yanaşır, onların yalnız savadlı deyil, həm də vətənpərvər, vicdanlı və ləyaqətli insan kimi yetişməsinə çalışırdı. Məhz buna görə də qısa müddət ərzində həm kollektivin, həm şagirdlərin, həm də kənd camaatının böyük hörmətini qazandı.
Onun həyat fəlsəfəsinin əsasını insan sevgisi təşkil edir. Bu sevgi süni və nümayişkaranə deyil, daxilindən gələn ilahi bir hissdir. O, insanlara yardım etməyi, problemlərinə şərik olmağı, dar gündə onların yanında dayanmağı həyatının ayrılmaz hissəsinə çevirib. Çünki Akif müəllim yaxşı anlayır ki, insanın böyüklüyü vəzifəsində deyil, qəlbindədir.
İllər keçdikcə Akif Ağalıyev yalnız müəllim kimi deyil, həm də el ağsaqqalı kimi tanınmağa başladı. İnsanlar onun sözünə inanır, məsləhətinə dəyər verir, çətin anlarında ona üz tuturdular. Bu hörmət təsadüfi deyildi. Çünki ağsaqqallıq yaşla deyil, əməllə qazanılır. Akif müəllim isə ömrü boyu dürüstlüyü, təvazökarlığı və xeyirxahlığı ilə insanların sevgisini qazanıb.
1988-ci ildə Siyaku kəndinə köçməsi və sonrakı illərdə müxtəlif məktəblərdə müəllim, psixoloq kimi fəaliyyət göstərməsi onun insanlara xidmət missiyasının davamı idi. Xüsusilə psixoloq kimi fəaliyyəti dövründə gənclərin mənəvi dünyasına daha dərindən nüfuz etməyi, onları düzgün istiqamətləndirməyi bacarıb. Çünki o, insan ruhunu anlamağı, insanların qəlbinə toxunmağı bilirdi.
1999-cu ildən başlayaraq dövlət idarəçiliyində çalışması da onun həyatında mühüm mərhələ oldu. Hamoşam kəndində icra nümayəndəsi, daha sonra rayon icra aparatında məsul vəzifələrdə çalışarkən də əsas prinsipindən — xalqa xidmət amalından dönmədi. İnsanların problemlərini dinləmək, onlara kömək etmək, dövlətlə vətəndaş arasında körpü olmaq onun fəaliyyətinin əsas xəttini təşkil edirdi.
Akif müəllimi tanıyanların hamısı bir fikirdə həmrəydir: o, Allah sevgisi ilə yaşayan insandır. Onun həyatında iman xüsusi yer tutur. O, dünyəvi nemətlərin müvəqqəti olduğunu anlayaraq mənəvi zənginliyi hər şeydən üstün tutub. Hər zaman halallığa, ədalətə və vicdana söykənən həyat yolu seçib. Elə buna görə də onun ömür yolu insanlara nümunədir.
Bu gün Akif Ağalıyev haqqında danışanda insanlar ilk növbədə onun səmimiyyətini vurğulayırlar. Çünki səmimiyyət insanın ruhundan gələn işıqdır. O işıq isə Akif müəllimin simasında hər zaman görünür. O, nə qədər böyük hörmət qazansa da, sadəliyini heç vaxt itirməyib. İnsanlarla münasibətində təvazökarlığı qoruyub, heç kimin qəlbini qırmamağa çalışıb.
Akif müəllimin həyat yolu göstərir ki, insanın ən böyük sərvəti onun adı və əməlləridir. Bu gün onun adı Astara camaatı arasında hörmətlə çəkilir. Çünki o, həyatını insanlara xidmətə, mənəviyyata və dövlətçiliyə sədaqətə həsr edib. O, yalnız ailəsinin deyil, bütöv bir elin ağsaqqalıdır.
Belə insanlar cəmiyyətin mənəvi dayaqlarıdır. Onlar yaşadıqları mühitə işıq gətirir, insanlara ümid verir, gənclərə örnək olurlar. Akif Ağalıyev də öz həyatı ilə sübut edib ki, dürüst yaşamaq, vicdanlı olmaq və insan sevgisini qorumaq mümkündür. Bunun üçün böyük sərvətə yox, böyük ürəyə sahib olmaq lazımdır.
Bu gün dəyişən dünyanın içində dəyişməyən insanlar çox azdır. Onlar zamanın içində mənəviyyatını itirməyən, insanlığını qoruyan nadir şəxsiyyətlərdir. Akif Ağalıyev də məhz belə insanlardandır. O, ömrü boyu Allahın kəndirindən yapışaraq, halallıq və insanlıq yolunda addımlayıb. Elə buna görə də onu tanıyanlar yalnız hörmət etmirlər, həm də sevirlər.
Salam, mərd kişi!
Sizin ömrünüz sadəcə yaşanmış illər deyil, insanlıq dərsidir. Siz, doğma Astaranın mənəvi sərvəti, elin ağsaqqalı, gənclərin örnəyi, ziyalılığın canlı təcəssümüsünüz. Ömrünüz boyu qazandığınız hörmət və sevgi isə sizin ən böyük mükafatınızdır. Və... Sadiq dostsunuz. Bu sədaqət haqqında daha sonra...
Çünki insanın ən böyük uğuru insanların qəlbində özünə yer qazanmasıdır. Akif Ağalıyev isə bu yeri çoxdan qazanıb...
Davamı var...

İltifatla
Hürü Hacızadə
Yazıçı-publisist,
“Qızıl Qələm” mükafatçısı

Fərid Faiqoğlu (Səfərov)
AVMVİB-nin fəxri üzvü
AJB-nin üzvü