Ürəyin “memarı”

I yazı

Layihənin rəhbəri: Akademik, Atatürk mərkəzinin rəhbəri Nizami Cəfərov

Vicdan, ləyaqət, şərəf üstəgəl peşəkarlıq...

Dünyanı Azərbaycana gətirən peşəkar

Məsləhətçi: Azərbaycan Ağsaqqallar Şurasının İdarə Heyətinin üzvü, hüquq elmləri doktoru, professor, əməkdar müəllim, birinci Qarabağ müharibəsi iştirakçısı İbrahim Quliyev

"Sən yaşayacaqsan!" – həyatın özünə çevrilən bir kəlmə

Onun haqqında çox yazılıb, çünki layiqdir. Astaradan başlayan Böyük Yolun yolçusudur. Zəhmət, istedad, məqsəd, məram onu Azərbaycanın, hətta dünyanın məşhur insanına və peşəkarına çevirdi. Tanrısı onu seçdi və xeyir-duasını verdi. Bu gün o, vətəninin sayılıb seçilən şəxsiyyətlərdəndir Dr. Rəşad Məmmədqulu oğlu Mahmudov...

Yeni yazı, nə birinci, nə sonuncu yazı...

Bəzən bir cümlə minlərlə kitabın deyə bilmədiyini deyir. Bəzən bir söz ümidsizliyin qaranlığında işığa çevrilir. Bəzən isə həmin söz insan ömrünün ikinci başlanğıcı olur.

"Sən yaşayacaqsan!"

Bu, sadəcə təsəlli deyil.

Bu, sadəcə həkimin xəstəyə söylədiyi adi bir ifadə də deyil.

Bu, peşəsinə sonsuz inanan, hər əməliyyata bir insan taleyi kimi yanaşan, minlərlə ürəyin yenidən döyünməsinə səbəb olan ürək-damar cərrahı, tibb üzrə elmlər doktoru, millət vəkili, Azərbaycan Ürək və Sağlamlıq Assosiasiyası İdarə Heyətinin sədri, Mərkəzi Gömrük Hospitalı Elmi-Təcrübi və Tədris Mərkəzinin rəisi Rəşad Mahmudovun həyat fəlsəfəsidir.

Çünki o bilir...

Ümid yaşayan yerdə həyat da yaşayır.

Həkimlik peşəsi qədimdən müqəddəs hesab olunub. İnsan ömrünü qorumaq Tanrının bəxş etdiyi ən ali missiyalardan biridir. Həkim isə bu missiyanın yer üzündəki daşıyıcısıdır. Hər kəs bu peşəni seçə bilər, amma hər kəs bu peşənin məsuliyyətini daşıya bilməz.

Rəşad Mahmudov məhz bu məsuliyyəti ömrünün mənasına çevirən insanlardandır.

Onun üçün ürək sadəcə anatomik orqan deyil. Ürək bir ailənin sevincidir. Ürək ananın övladına sarılmasıdır. Atanın övladını məktəbə aparmasıdır. Nənənin nəvəsinə dua etməsidir. Əsgərin Vətənə xidmət etməsidir. Müəllimin sinfə daxil olmasıdır. Bir sözlə, ürək həyatın özüdür.

Məhz buna görə də ürəyə toxunmaq yalnız tibbi peşəkarlıq yox, həm də vicdan, mərhəmət və mənəvi cəsarət tələb edir... 

Haşiyə...

Onun haqqında ilk yazını 15 il bundan qabaq yazmışdıq. Ürək transplantasiyasının, köçürülməsinin yeni dövrünü yaşayırdı Azərbaycan. Gənc bir peşəkardan gedirdi söhbət. Azərbaycanın əyalətində doğulub paytaxt Bakıda həkimlik peşəsinə sahib olan sadə bir gəncin peşəkarlığı gündəm idi. Gəncdir, amma çox savadlı və istedadlıdır. Hörmətli Mehriban xanımın marağını kəsb etmişdir. Çünki, Mehriban xanım özü həkimdir. Bu sahənin nə qədər məsuliyyətli olduğunun fərqindədir. Cavabdehlik və məsuliyyət. Mehriban Əliyeva ona inandı və xeyir-dua verdi. Bu gənc mütəxəssisin həkimlik taleyində böyük bir dönüş yarandı. Tanrı deyir: “Səndən hərəkət, məndən bərəkət”. Məhz Mehriban xanım Allahın Rəşad Mahmudov üçün göndərdiyi bir mələk rolunda oldu. İstedada yol açdı. Zatən bu Mehriban xanımın nəcabət və ləyaqət formatıdır...

Əməliyyat otağında saniyələrin taleyə çevrildiyi anlar olur. Bir neçə saat davam edən ağır əməliyyatın arxasında aylarla aparılan hazırlıq, illərlə qazanılmış təcrübə və ömür boyu davam edən zəhmət dayanır.

Rəşad Mahmudov bu zəhmətin canlı nümunəsidir.

Onun minlərlə uğurlu ürək əməliyyatı tibbin statistik göstəricisi deyil. Hər biri bir ailənin yenidən doğulan sevincidir. Hər biri bir uşağın atasını itirməməsidir. Hər biri bir ananın göz yaşının sevinc göz yaşına çevrilməsidir. Bəlkə də buna görə xəstələr onu sadəcə cərrah kimi deyil, həyatlarını dəyişən insan kimi xatırlayırlar. İnsanların yaddaşında qalmaq üçün yüksək vəzifə kifayət etmir. Bunun üçün insanın ürəyinə yol tapmaq lazımdır. Rəşad Mahmudov bunu bacaran insanlardandır.

Doktor Rəşad Mahmudovun saysız statusunu sadalamağa ehtiyac yoxdur. Rəşad doktor onsuz da xalqın və Azərbaycanın öz peşəkarlığı və nümunəvi vətəndaşlığı ilə özünü çoxdan “xalqın doğması” olaraq sübuta yetirmişdir...

O, əməliyyatdan əvvəl xəstəsinin gözlərinin içinə baxaraq dediyi "Sən yaşayacaqsan!" sözünü təkcə dillə demir.

Bu söz onun baxışlarında görünür. Əllərində hiss olunur. Peşəkarlığında təsdiqini tapır.

Əməliyyat masasından qalxan hər xəstə həmin sözün necə böyük gücə malik olduğunu anlayır.

Çünki bəzən dərman qədər ümid də insanı sağaldır.

Müasir tibbin inkişaf etdiyi bir dövrdə texnologiya nə qədər irəliləsə də, insan amili dəyişmir.

Ən müasir aparat belə mərhəmətin yerini verə bilmir. Ən müasir cihaz insanın qəlbinə toxuna bilmir.

Bu isə yalnız böyük həkimlərə məxsus xüsusiyyətdir. Rəşad Mahmudovun peşəkar fəaliyyətinin mühüm istiqamətlərindən biri də elmdir.

Tibb üzrə elmlər doktoru kimi apardığı araşdırmalar, beynəlxalq elmi tədbirlərdə iştirakı, müasir ürək cərrahiyyəsinin inkişafına verdiyi töhfələr onun yalnız praktik həkim deyil, həm də güclü alim olduğunu göstərir.

Elm daim yenilənməyi tələb edir. Həkim isə öyrənməyi heç vaxt dayandırmamalıdır.

Bu prinsiplə yaşayan Rəşad Mahmudov hər zaman yeni tibbi texnologiyaların Azərbaycanda tətbiqinə xüsusi önəm verib.

Bu gün Mərkəzi Gömrük Hospitalının Elmi-Təcrübi və Tədris Mərkəzi ölkənin ən müasir tibb ocaqlarından biri hesab olunur. Burada dünyanın qabaqcıl klinikalarında istifadə olunan tibbi avadanlıqlar tətbiq edilir. Burada elmi yanaşma praktik təcrübə ilə vəhdət təşkil edir.

Burada gələcəyin həkimləri yetişir.

Bu uğurların arxasında isə peşəkar idarəçilik, sistemli fəaliyyət və böyük zəhmət dayanır.

Azərbaycan Ürək və Sağlamlıq Assosiasiyasının İdarə Heyətinin sədri kimi Rəşad Mahmudov təkcə xəstə insanları müalicə etməklə kifayətlənmir. O, sağlam cəmiyyət formalaşdırmağa çalışır. Maarifləndirmə layihələri... Elmi konfranslar... Ürək xəstəliklərinin erkən diaqnostikası... Sağlam həyat tərzinin təbliği...

Bütün bunlar gələcək nəsillərin sağlam böyüməsinə xidmət edir. Çünki ən yaxşı müalicə xəstəliyin qarşısını almaqdır.

Millət vəkili kimi fəaliyyəti də onun xalqa xidmət missiyasının davamıdır.

Parlament tribunasında səsləndirdiyi fikirlər, səhiyyə sahəsində qanunvericiliyin təkmilləşdirilməsi istiqamətində təşəbbüsləri, seçicilərlə daimi ünsiyyəti göstərir ki, o, insanların problemlərini yalnız xəstəxanada deyil, dövlət idarəçiliyində də həll etməyə çalışır. Əsl ziyalı harada olursa-olsun, insanlara xidmət etməyi özünə borc bilir. Rəşad Mahmudov da məhz belə ziyalılardandır.

Azərbaycan səhiyyəsinin son illərdə qazandığı uğurlar dövlətimizin bu sahəyə göstərdiyi xüsusi diqqətin nəticəsidir.

Yeni xəstəxanalar... Ən müasir tibbi avadanlıqlar... Yüksək texnologiyalar... Beynəlxalq əməkdaşlıq...

Peşəkar kadr hazırlığı... Bütün bunlar Prezident İlham Əliyevin rəhbərliyi ilə həyata keçirilən uğurlu səhiyyə siyasətinin tərkib hissəsidir.

Bu inkişaf yolunda peşəkar həkimlərin rolu isə danılmazdır. Rəşad Mahmudov həmin həkimlər sırasında xüsusi yer tutur. 

Hər uğurlu əməliyyat böyük zəfərdir.

Bu zəfərin müəllifi isə peşəsinə aşiq olan insanlardır. Belə insanlar cəmiyyətin ən qiymətli sərvətidir. Onlar görünməyən qəhrəmanlardır. Əllərində silah yox, skalpel tuturlar. Amma onların mübarizəsi də həyat uğrundadır. Onlar da ölümə qarşı savaşırlar. Onlar da insanları həyata qaytarırlar. Məhz buna görə Rəşad Mahmudovu "Ürəyin memarı" adlandırırlar. Memar necə daşlardan bina tikirsə, o da bilikdən, təcrübədən, məsuliyyətdən və insan sevgisindən həyat inşa edir. Onun qurduğu ən möhkəm bina isə insanların etimadıdır. Bu etimad illərlə qazanılıb. Minlərlə uğurlu əməliyyatla möhkəmlənib. Minlərlə təşəkkür məktubu ilə böyüyüb. Minlərlə duaya çevrilib. Həyatda bəzi insanlar vəzifələri ilə tanınırlar.

Bəziləri isə gördükləri işlə. Rəşad Mahmudov ikinci kateqoriyaya aid olan şəxsiyyətlərdəndir.

Onun adı çəkiləndə ilk yada gələn ürəkdir. Ümiddir. Yaşamdır. Və o məşhur cümlə... "Sən yaşayacaqsan!" Bu söz təkcə bir xəstəyə deyilmir. Bu söz həyata ünvanlanır. İnsana ünvanlanır.

Sabaha ünvanlanır. Bu söz Azərbaycan təbabətinin humanizm ruhunu ifadə edir. Bu söz peşəsinə aşiq olan bir həkimin daxili inamıdır. Bu söz minlərlə insanın yenidən doğulan ömrüdür.

Bəlkə də buna görə Rəşad Mahmudov haqqında yazarkən onu yalnız ürək cərrahı adlandırmaq kifayət etmir. O, ürəkləri sağaldan alimdir. İnsanlara ümid bəxş edən həkimdir. Xalqa xidmət edən millət vəkilidir. Gənc həkimlər yetişdirən müəllimdir. Sağlam gələcəyin memarlarından biridir…

PS. Azərbaycanın ürək-damar cərrahı, tibb üzrə elmlər doktoru, millət vəkili, Milli Məclisinin deputatı, Azərbaycan Ürək və Sağlamlıq Assosiasiyası idarə heyətinin sədri, Azərbaycan Respublikasının əməkdar həkimi Rəşad Mahmudov. Yolçu yolunda gərək, hörmətli doktorumuz. Hələ çalınacaq qələbələriniz qarşıdadı, çünki Sizi Tanrı seçdi. Allah amanında…

Hörmətlə,

Hürü Hacızadə

Yazıçı-publisist,

“Qızıl qələm” mükafatçısı

Fərid Səfərov

Xezertv.info-nun rəhbəri,

AJB-nin üzvü