Sumqayıt şəhərində 8 Noyabr – Zəfər Günü münasibətilə növbəti ağacəkmə aksiyası təşkil olunub.
Sumqayıt Bulvarı ərazisində baş tutan aksiyada Sumqayıt Şəhər İcra Hakimiyyətinin başçısı Zakir Fərəcov, hüquq-mühafizə orqanlarının, idarə, müəssisə və təşkilatların rəhbərləri, şəhid ailələrinin üzvləri, qazilər və ictimaiyyət nümayəndələri iştirak ediblər.
Genişmiqyaslı aksiya çərçivəsində bulvar ərazisində 2250 ədəd zeytun ağacı əkilib. Əkilən ağaclara aqrotexniki qulluq göstərilib, onların dibləri yumşaldılıb, suvarma və digər zəruri qulluq işləri həyata keçirilib.
Vurğulanıb ki, 44 günlük Vətən müharibəsində qazanılmış tarixi Qələbənin ildönümünə həsr olunan aksiya həm də özündə xüsusi rəmzi məna daşıyır. Əkilən hər bir ağac Vətən uğrunda canından keçən şəhidlərimizin əziz xatirəsinə ehtiramın, doğma torpağa sevginin, sülhün və gələcəyə inamın ifadəsidir.
Bununla yanaşı, Sumqayıt Bulvarı ərazisində Ekologiya və Təbii Sərvətlər Nazirliyinin və Sumqayıt Şəhər İcra Hakimiyyətinin birgə təşkilatçılığı ilə “Tullantıları tinglərə dəyiş” aksiyası da keçirilib. Aksiya çərçivəsində vətəndaşlar plastik və şüşə tullantıları, eləcə də işlənmiş batareyaları təhvil verərək əvəzində müxtəlif ağac tingləri əldə ediblər. Tədbirin əsas məqsədi tullantıların çeşidlənməsi və təkrar emalının təşviqi, əhalinin ekoloji maarifləndirilməsi, ətraf mühitin mühafizəsi və yaşıllıq sahələrinin artırılmasına ictimai dəstəyin gücləndirilməsi olub.
Qeyd edək ki, son illər Sumqayıt şəhərində ekoloji tarazlığın qorunması, yaşıllıq zolaqlarının genişləndirilməsi və şəhərin estetik görünüşünün daha da yaxşılaşdırılması istiqamətində ardıcıl tədbirlər həyata keçirilir. Xüsusilə Xəzər dənizinin sahilboyu ərazisində salınmış Sumqayıt Bulvarının yaşıllaşdırılması, yeni ağac və dekorativ bitkilərin əkilməsi, mövcud yaşıllıqlara mütəmadi qulluq göstərilməsi daim diqqət mərkəzində saxlanılır.
Bu istiqamətdə həyata keçirilən tədbirlər şəhərin ekoloji mühitinin yaxşılaşdırılmasına, sakinlərin istirahəti üçün daha əlverişli şəraitin yaradılmasına və Sumqayıtın müasir, yaşıl şəhər kimi inkişafına mühüm töhfə verir.