Dünən Ermənistanın baş naziri Nikol Paşinyanın iştirakı ilə hakim partiyanın ofisində siyasi qurumun təşəbbüs qrupunun iclası keçirilib. Burada deputatlarla yanaşı, partiyanın sıravi üzvləri də iştirak ediblər. Ermənistan Təhlükəsizlik Şurasının katibi Armen Qriqoryan üçtərəfli görüşlə bağlı məruzə ilə çıxış edib və iştirakçıların suallarını cavablandırıb, Paşinyan isə öz təəssüratı barədə cəmi üç dəqiqəlik çıxış edib, digər çıxışlar zamanı isə bəzən yerindən replikalar səsləndirib. Görüş bir saata yaxın davam edib.
Bu barədə Ermənistanın “Hraparak” nəşri yazır.
“Paşinyanın qısa nitqindən hakim partiya üzvlərində belə bir təəssürat yarandı ki, o, Brüsseldə əldə olunan nəticələrdən o qədər də razı deyil, baxmayaraq ki, o, görüşlə bağlı rəqəmlərə, yəni vəd edilən məbləğə əsaslanaraq fikir formalaşdırmağın mümkün olmadığını deyib. Çünki bu, aysberqin yalnız görünən hissəsidir və dərinliklərdə kollektiv Qərb bu müqavilə ilə geniş və uzunmüddətli əməkdaşlığa hazır olduğunu nümayiş etdirir. ABŞ və Qərbin Ermənistan iqtisadiyyatının şaxələndirilməsi prosesində yaranan hər hansı maneəni və arzuolunmaz nəticələri aradan qaldırmağa hazır olduğuna dair təminat almadığını da bildirib.
Birdən Rusiya Lars yolunu bağlasa və ya başqa əngəllər yaratsa, Avropa elə həmin anda alternativ təklif edəcəyinə söz vermir, sadəcə olaraq, Ermənistanın iqtisadiyyatı və təhlükəsizliyi ilə bağlı bütün problemləri müzakirə etməli olduqları bildirilib. Ermənistana nəsə lazımdırsa, onlar oturub müzakirə etməyə hazırdırlar. Verəcəklər, ya verməyəcəklər, hansısa problemi həll edəcəklər, ya həll etməyəcəklər - bu, artıq başqa sualdır. Buna baxmayaraq, Paşinyan hesab edir ki, Qərblə əməkdaşlıq davam etdirilməlidir.
Hakim partiyanın bəzi üzvləri Qərb əməkdaşlığının arzuolunmaz nəticələri ilə maraqlanıb və soruşublar ki, ölkə öz üzərinə hər hansı öhdəlik götürübmü? Söylənənlər LGBT icmasının maraqlarının təşviqi və mübahisəli İstanbul Konvensiyasının ratifikasiyası ilə bağlı dəqiqləşdirilib. Nikol Paşinyan yumoristik şəkildə sualdan yayınmağa çalışaraq bildirib ki, bəli, gizli razılaşmalar deyilən belə bir tələb var idi. Biz həmin sazişlər zamanı bu məsələləri müzakirə etdik, lakin o, öz cavabı ilə eyni zamanda, açıq şəkildə qeyd edib ki, konvensiya çoxdan Ermənistanın gündəmindədir və gec-tez ratifikasiya edilməlidir.
Armen Qriqoryanın mövqeyinə gəlincə, bu, dəyişməyib: Brüsseldəki görüşlər öncəsi qapalı partiya formatında müzakirələr zamanı xatırladırıq ki, partiya üzvlərinin fikrincə, Ermənistan Təhlükəsizlik Şurasının katibi Ermənistanın inkişafının regiondan kənarda mümkün olmadığına əminliyini bildirib. Dünənki görüşdə Qriqoryanın yekun fikri ondan ibarət idi ki, onun proqnozları, əslində, özünü doğrultdu - Qərbin təklif etdiyi onun gözlədiyindən də artıqdır”, - deyə məqalədə bildirilir.