Yay mövsümündə vətəndaşların bir qismi şəhərdən bağ evlərinə köçdüyündən, eləcə də bölgələrə və xaricə istirahətə getdiyindən müəyyən müddət mənzillərdə yaşayış olmur.
Bu barədə Azərbaycan Dövlət Su Ehtiyatları Agentliyinə məxsus “Azərsu” ASC-nin abonentlərinə müraciətində bildirilir.

Qurum bəyan edib ki, bu zaman sudan ya ümumiyyətlə istifadə edilmir, ya da qismən istifadə olunur. “Azərsu” ASC-nin əməkdaşları mənzilin və həyət evlərinin daxilindəki sayğaca baxış keçirib oxuma etmək istədikdə qapı bağlı olduğundan sayğacın real sərfiyyatına uyğun deyil, son 12 ayın orta sərfiyyatına uyğun bildiriş çap olunur. Sonradan evinə dönən abonentlər artıq borcun yaranmasından narahat olur, bununla bağlı “Azəsu”ya, cəmiyyətin yerli bölmələrinə çoxlu şikayət və müraciət edilir. Bu qeyri-dəqiqliyin həll yolu isə sonradan sayğacın real sərfiyyatına uyğun dürüstləşmə aparılmasıdır.