Son günlər bəzi internet resurslarında Milli Məclisin deputatı Sevinc Fətəliyeva haqqında - onun güya müəyyən bankın fəaliyyətinə himayədarlıq etdiyi, məhkəmə proseslərinə müdaxilə göstərdiyi və ayrı-ayrı sahibkarlıq mübahisələrində xüsusi marağının olduğu barədə iddialar yer alır. Bu tip yazılarda ağır ittihamlar irəli sürülsə də, onların təsdiqini göstərən konkret və yoxlanılmış sübutların ictimaiyyətə təqdim olunması ayrıca məsələdir.

Rəsmi məlumatlara əsasən, Sevinc Fətəliyeva 23 sentyabr 2024-cü ildə 30 saylı Suraxanı birinci seçki dairəsindən Milli Məclisin deputatı seçilib. O, hazırda Elm və təhsil komitəsinin, eləcə də Beynəlxalq münasibətlər və parlamentlərarası əlaqələr komitəsinin üzvüdür. Milli Məclisin açıq məlumatlarında onun fəaliyyəti parlament və beynəlxalq parlamentlərarası əlaqələr çərçivəsində göstərilir.

Məhz buna görə deputatın konkret bankın “koordinatoru və qoruyucusu” olması barədə yayılan iddia yalnız ifadə ilə deyil, mötəbər sənədlərlə əsaslandırılmalıdır. Açıq rəsmi mənbələrdə deputatın hər hansı bankın fəaliyyətinə nəzarət etməsi, məhkəmə hakimlərinə göstəriş verməsi və ya konkret kommersiya mübahisəsində tərəflərdən birinin maraqlarını müdafiə etməsi barədə məlumat görünmür.

Məsələnin digər mühüm tərəfi ondan ibarətdir ki, məhkəmə işi ilə bağlı irəli sürülən iddialar deputatın adı ilə avtomatik şəkildə əlaqələndirilə bilməz. Əgər hər hansı şəxs deputatın məhkəmə prosesinə müdaxilə etdiyini iddia edirsə, bunun üçün tarix, sənəd, yazılı göstəriş, rəsmi müraciət, məhkəmə materialı və digər yoxlanıla bilən sübutlar ortaya qoyulmalıdır. Əks halda, hüquqi mübahisənin siyasi şəxsə bağlanması ictimaiyyətin məsələnin mahiyyətini obyektiv qiymətləndirməsini çətinləşdirir.

Burada daha bir mühüm məqam var. Hazırda internetdə yayılan materialların bir hissəsində “bizə verilən məlumata görə” formasında ifadələrdən istifadə edilir. Belə ifadə müəllifin həmin məlumatı müstəqil şəkildə təsdiqləmədiyini göstərir. Xüsusilə deputatın nüfuzuna və ictimai fəaliyyətinə toxunan ciddi ittihamlar üçün yalnız anonim və ya qeyri-müəyyən mənbəyə istinad kifayət hesab edilə bilməz.

Digər tərəfdən, Yelo Bankın rəsmi rəhbərlik səhifəsində bankın Müşahidə Şurası və İdarə Heyətinin üzvləri açıq şəkildə göstərilir. Həmin siyahıda Sevinc Fətəliyevanın adı bank rəhbərliyinin üzvü kimi təqdim edilmir. Yelo Bank bu faktı özü-özlüyündə bütün digər iddiaları həll etmir, lakin deputatın bankın formal idarəetmə strukturunda yer alması barədə təsəvvürün əsaslı olmadığını göstərir.

Belə görünür ki, deputat Sevinc Fətəliyevanın adına siyasi çalar verməklə yanaşı, onun haqqında qarayaxma və sifariş xarakterli yazıların dərc olunması barədə narahatlıq da ayrıca araşdırılmalıdır. Jurnalistikanın əsas prinsiplərindən biri ittihamın qarşı tərəfin mövqeyi ilə birlikdə təqdim olunması, faktla ehtimalın bir-birindən ayrılması və şəxsin nüfuzuna xələl gətirə biləcək iddiaların sənədlərlə yoxlanılmasıdır.

Bu səbəbdən konkret şəxsin adının müxtəlif məhkəmə və kommersiya mübahisələrinə sübutsuz şəkildə bağlanması əvəzinə, ortada olan məhkəmə qərarları, ekspertiza rəyləri, icra sənədləri və digər rəsmi materiallar ayrıca hüquqi müstəvidə araşdırılmalıdır. Deputatın öz mövqeyi də nəzərə alınmalı və ona qarşı irəli sürülən iddiaların hansı konkret sübuta əsaslandığı açıq şəkildə göstərilməlidir.

İctimaiyyətə təqdim olunan məlumatlarda ittiham xarakterli fikirlərlə təsdiqlənmiş faktlar qarışdırılmamalıdır. Sevinc Fətəliyevanın məhkəmə-hüquq sisteminə müdaxiləsi və ya hər hansı bankın maraqlarını qoruması barədə iddiaların hüquqi qiyməti yalnız müvafiq sənədlər və səlahiyyətli qurumların araşdırması əsasında müəyyən edilə bilər. Hazırda isə rəsmi parlament məlumatları onun deputat kimi fəaliyyət istiqamətlərini göstərir, lakin yuxarıda qeyd olunan ağır iddiaları təsdiqləyən açıq rəsmi sübut təqdim etmir.

Fərid Səfərov

“Xezertv.info” informasiya agentliyinin rəhbəri,

Azərbaycan Jurnalistlər Birliyinin üzvü, 

“Qızıl qələm” mükafatçısı,

AVMVİB-nin fəxri üzvü, 

“Qayğıya Ehtiyacı və Əlilliyi Olan Şəxslərə Dəstək” İB-nin mətbuat katibi

e.o. Baş leytenant