Günəş doğur və qürüb edir... Dünyanın bu əzəli-əbədi mənzərəsi yaranışdan beləcə sərgilənməkdə, dövr etməkdədir. Düşünürəm ki, işıqlı insanlar da belədir. Həyata vida desələr də, yaddaşlara köçən əməlləri ilə yenidən doğulurlar. Belələri  sanki günəştək qürüb edib...Yaddaş  aynamda əsrlərin, qərinələrin ta o üzündən üzü bəri gələn dəyər  əsintiləri ilə müdrinklərin işıqlı idrakından süzülərək hasil olan  bir qənaət, deyim bərq vurur: insanın əsl ömrü xatırlandığı qədərdir. O da ola bütöv həyatını, varlığını xalqına, vətəninə, insanlığa  həsr etmiş tarixi şəxsiyyətlər, el yaddaşında abidəyə dönən işıqlı əməl sahibləri... 

    23 dekabrda Aşağı Qarxun kənd Musiqi məktəbində keçirilən ümummilli lider Heydər Əliyevin  100 illik yubileyinə həsr olunmuş  “Heydər Əliyev və Azərbaycan müəllimi (Yevlax rayonu Aşağı Qarxun kənd tam  orta məktəbinin  dünyasını dəyişmiş müəllimlərinin həyat və fəaliyyəti kontekstində)” mövzusuna həsr olunmuş ədəbi-bədii gecə düşüncələrimin  günlükləndiyi, fikrimə müqəddimə etdiyim həqiqətin bir daha təzahürü, təsdiqi oldu.                  

 ƏDƏBİ-BƏDİİ GECƏNİN TƏŞKİLAT KOMİTƏSİ

Sədr: Bərxudarov Mənsur İsa oğlu – Azərbaycan Dövlət İqtisad Universiteti, Rus iqtisad məktəbinin (UNEC RESH) Direktoru

Həmsədrlər: 1)Bərxudarov Camal Saməddin oğlu–Qarxun kənd tam  orta məktəbinin direktoru

2) Əlibəyli Tapdıq Abış oğlu –  şair-publisist, Azərbaycan Yazıçılar Birliyinin üzvü, Prezident təqaüdçüsü  

3) Əliyev Hikmət İslam  oğlu –Azərbaycan Jurnalistlər Birliyinin üzvü, tədqiqatçı-jurnalist;

4) Bostanov Rövşən Əbülfət oğlu – Aşağı Qarxun Bələdiyyəsinin sədri

     Dövlətçilik məfkurəsi Azərbaycan Bayrağının ucalığı olan ümummilli lider, xilaskar öndər Heydər Əliyevin “MƏN YER ÜZÜNDƏ MÜƏLLIMDƏN YÜKSƏK AD TANIMIRAM” fikri fonunda tədbiri giriş sözü ilə açan Azərbaycan İqtisad Universiteti Rus İqtisad Məktəbinin  (UNEC RESH) direktoru, iqtisadçı - alim  Mənsur  İsa oğlu Bərxudarov movzu kontekstində fikirlərini bölüşdü. Sonra isə sözü  “Azərbaycan elmi-pedaqoji həyatında Heydər Əliyev şəxsiyyəti və kompleks maariflənmə prosesi” işığında Azərbaycan Yazıçılar Birliyinin üzvü, Prezident təqaüdçüsü, şair-publisist Tapdıq Əlibəyliyə həvalə etdi. 

Şəhid Xanlar Məmmədov adına  Aşağı Qarxun kənd  tam orta məktəbinin direktoru       “Aşağı Qarxun kənd  tam orta məktəbinin dünyasını dəyişmiş müəllimləri böyük ziyalılar kimi” movzusu ilə tədbiri davam etdirdi.  Dünyasını dəyişmiş müəllimlər: İsa Bərxudarov İmam Kərimov, Mütəllim Hacıyev, Məcid Hacıyev, Almaz Kərimova, Bəkir Fərəcov, Məhəmməd Abdullayev və Azər Abdullayevin həyat və pedaqoji fəaliyyətləri fonunda  əziz xatirələri ehtiramla yad edildi. 

Mənsur  Bərxudarovun  “Qarxunlu İsa müəllim fenomeni” xatirat, faktoloji-sosioloji ümumləşdirmələri  tədbir iştirakçılarını təsirləndirdi. Beə ki, 21 mart 2021- ci ildə vəfat etmiş, 90 illik yubileyi qeyd olunan, el sevgisi qazanmış müdrik  ağsaqqal, ömrünün yarım əsrdən çoxunu şagirdlərin təlim-tərbiyəsinə həsr etmiş təhsil fədaisi, həyat kredosu xaliqə məhəbbət, xilqətə mərhəmətdən yoğrulmuş ziyalı olaraq ehtiramla yad edilən İsa Camal oğlu Bərxudarovun şərəfli həyat yoluna bir işıq tutuldu. 

    Ədəbi-bədii gecə tarix elmləri doktoru, professor Xəqani Məmmədov, tarix elmləri doktoru, professor Vaqif Hacıyev, tədqiqatçı - jurnalist  Hikmət İslamoğlu, Şəhid atası İdris Yusifov, kənd ağsaqqalarından olan  Bədəl Hacıyev, Şəkidən gəlmiş qonaqlar - qocaman pedaqoq, İsa müəllimin tələbə yoldaşı İsmayıl Ələkbərov, şair Qoca Xalid, Qarxun kənd məktəbinin müəllimləri və digər çıxışçıların öz fikirlərini, xatirələrini bölüşməsi ilə daha da maraqlı oldu. 

   Şagirdlərin şair sözünün sinonimi sandığım Səməd Vurğunun  “AZƏRBAYCAN”  şeirini  söyləmələri isə tədbirə məxsusi çalar gətirdi. Elə bu ovqatla Tapdıq Əlibəyli “AZƏRBAYCAN – TANRI YAZAN ÜNVANIM” şeirilə ədəbi-bədii gecəni yekunlaşdırdı. 

Qeyd edim ki,  tədbir öncəsi,  Aşağı Qarxun kənd qəbirastanlığında dəfn edilmiş  İsa Bərxudarovun məzarı ziyarət olundu, ruhuna dualar edildi. Əbədiyyət ünvanı nurlu, ruhu şad olsun. El yaddaşında abidəyə dönənlər heç vaxt unudulmur!                                                                 

Tapdıq ƏLİBƏYLİ